Чамд хэн итгэх вэ? Вангийн нулимс 1

Чамд хэн итгэх юм бэ?” гэх дотогшоолсон, гадагшаалсан асуултын дор бичигдсэн “Вангийн нулимс”, “Харь хэлээр яригсад”, “Сүрэг” гэсэн гурамсан романы эхний дэвтэр нь энэ ажээ.

Би бээр тус номонд гарч буй ихэнх улс орон хот суурин, байгаль уул усыг өөрийн биеэр үзэж өнгөрсөн. Заримаар нь аялж, зарим газар нь амьдарч, зохиолд гарч буй зовлон жаргалын аль алинаас нь балгаж залгиж байлаа. Цаашид ч явах олон зам надад буй гэж өөртөө хэлдэг. Дараагийн цувралуудаар илүү сонирхолтой адал явдал, гайхамшигтай аялал та бид хоёрыг хүлээж буй гэдэгт итгэж байна. Ертөнц дээр хэн ч чамд итгэхгүй үе ирж болно. Итгэл үнэмшилдээ л үнэнч үлд. Найдвар хэзээд байдаг... хэмээн зохиогч хэлжээ.

Номын гол дүр болох Германд эмийн маркетингийн чиглэлээр мастерийн сэдэв хамгаалаад ирсэн, мэргэжилдээ чадварлаг, гүйлгээ ухаан сайтай, сэтгэл татам сайхан залуу Улсболд. Улсаа ээж хүү хоёроосоо хол хэдэн жилийг эрдэм номын мөр хөөж өнгөрөөсөн бөгөөд Монголдоо томоохонд тооцогдох эм ханган нийлүүлэх “ЭмЧинТун” группэд Маркетинг судалгааны газрын даргаар ажилд орж байгаагаар үйл явдал эхэлнэ. Түүнийг ажилд ороод удаагүй байтал Эмийн үйлдвэрийн захирал Нямцав удирдлагын багийн хурал дээр ирж хэрүүл шуугиан тарих бөгөөд тун удалгүй тэрээр амиа хорлосон байдалтайгаар олдож олныг цочирдуулна. Улсаа энэ хэрүүл маргааны үеэр утасныхаа voice record-ийг санамсаргүй байдлаар ажиллуулан захиралын өрөөнд орхисон байх бөгөөд Трейдийн захирал Цог, Нямцав нарын Улаанбурхан өвчний эсрэг тарилгын талаарх сэжиг бүхий яриа утсанд нь бичигдэж үлдсэнийг сүүлд олж сонсоод өөрийн хүү Ариунтөрийг мөн энэхүү тарилгын золиос болсныг ойлгоно. Ингээд Улсаа энэхүү хэргийн учрыг олохын тулд асуудалд эргэж буцалтгүй хутгалдаж орхино…

…Энэ хэрэгт зөвхөн “ЭмЧинТун”-ны удирдлагууд холбогдоод зогсохгүй Монгол талаас хамгийн гол захиалагч нь Гантулга доктор аж. Тэрээр эрх мэдэл, хөрөнгө мөнгөний төлөө хятадуудтай холбоо сүлбээтэй ажиллах бөгөөд Ху Шень гэх Монгол орныг туршилтын “харх” хэмээн хардаг хятад доктортой гар нийлэн ажиллаж, мөнгө угаана. Ху Шень хэд хэдэн төрлийн өвчний вирусын туршилтыг монголд хийх бөгөөд үүнд нь Гантулга тэргүүтэй хэсэг бүлэг эрүүл мэндийн салбарынхан гар бие оролцон, дэмжинэ.

Ху Шений гол зорилго бол дэлхийг өмнөө сөхрүүлж чадах хүчтэй “бактериологийн зэвсэг” бүтээх явдал бөгөөд өөрөө зөвхөн ерөндөгийг эзэмшиж эрх мэдэл, мөнгө, дайн дажин бүхнийг гартаа атган өөрийн хаанчлалаа тогтоохыг санаархана.

Харин Ван доктор насаараа зорьж тэмцсэн агуу нээлтээ хийж чадсан ч энэ зүйл буруу хүмүүсийн гарт орвол ямар их гай гамшиг авчрахыг төсөөлж байсан тул нулимсаа унаган байж бүтээлээ “Вангийн нулимс” гэж нэрийдэн амиараа хамгаалан, нууцлахаар шийддэг. Ван доктор өөрийн дагавар охин Лин Линд үүдэл эсийг зогсоох вирус, түүний ерөндөгийг нууцаар дамжуулан Хятадаас дүрвэж гарах заавар өгч амжсан байдаг ч харамсалтай нь түүнд өөрийн болон гэр бүлийнхнийхээ амь насыг аврах аз завшаан дутна.

…Улсаа энэ хэргийн учрыг олж, хүүгээ аврахын тулд Монголд байгаад нэмэргүй гэдгийг ойлгон, олон улсын байгууллагад хандах нь хамгийн зөв юм байна гэсэн шийдвэрт хүрч, ээж, хүү хоёроо Эрдэнэт рүү нүүлгээд дахин европ руу гардаг...

Монгол